ගල්කිස්ස, වටරප්පල, සෙම්බලන්කොටුව ප්‍රදේශයේ අද අලුයම සිදු වූ වෙඩි තැබීමකින් පුද්ගලයින් දෙදෙනෙකු ජීවිතක්‍ෂයට පත් වුණා.
සෙම්බලන්කොටුව ප්‍රදේශයේ නිවසක සිටි පුද්ගලයින් දෙදෙනෙකුට යතුරු පැදියකින් පැමිණි නාඳුනන පුද්ගලයින් දෙදෙනෙකු විසින් එම වෙඩි තැබීම සිදු කර පලාගොස් ඇති බවයි පොලීසිය පැවසුවේ.
වෙඩි ප්‍රහාරයට ලක්වූ 36 හැවිරිදි පුද්ගලයෙකු එම ස්ථානයේදීම මියගොස් තිබෙනවා.
වෙඩි ප්‍රහාරයට ලක්වූ 20 හැවිරිදි අනෙක් පුද්ගලයා කළුබෝවිල රෝහලට ඇතුළත් කිරීමෙන් පසු මියගොස් ඇති බවයි පොලිස් මාධ්‍ය ප්‍රකාශක කාර්යාලය පැවසුවේ.
මත්ද්‍රව්‍ය ජාවාරම්කරුවන් දෙපිරිසක් අතර ඇතිවූ ගැටුමක් හේතුවෙන් මෙම වෙඩිතැබීම සිදු කර ඇති බවටයි පොලීසිය සැක පළ කරන්නේ.
වෙඩි ප්‍රහාරයට ලක්ව මියගොස් ඇත්තේ බඩෝවිට අසංක නමැති නමැත්තාගේ ගෝලයින් දෙදෙනෙක්. දෙහිවල කොස් මල්ලි හෙවත් යකා සමන්ත නමැත්තාගේ පාර්ශවයෙන් වෙඩි තැබීම සිදු කර ඇති බවටද පොලීසිය සැක පළ කරනවා.
මෙම දෙපාර්ශවය අතර පවතින ආරවුල හේතුවෙන් පසුගිය කාලය පුරා සිදුවූ වෙඩි තැබීම් කිහිපයකදී පුද්ගලයින් 06 දෙනෙකු මියගොස් ඇති බවද පොලිස් වාර්තා අනාවරණ කළා.
