උමා ඔය ව්‍යාපෘතිය හේතුවෙන් සිදු ඇති හානිවලට වග කිවයුත්තේ තමන් හා පසුගිය ආණ්ඩුව බවට එල්ලවන චෝදනාවලට හිටපු ජනාධිපති මහින්ද රාජපක්ෂ මහතා අද (28) පිළිතුරු ලබා දුන්නා. ඒ, විශේෂ මාධ්‍ය නිවේදනයක් නිකුත් කරමින්.
උමා ඔය ව්‍යාපාතියෙන් ගැටලූ මතු වූ පසු ජනතා විමුක්ති පෙරමුණේ මන්ත‍්‍රීවරුන්, යහපාලන ආණ්ඩුවේ ඇමතිවරුන් හා ඔවුන්ට පක්ෂපාත පිරිස් එම ගැටලූ සියල්ලටම වග කිව යුත්තේ තමන් සහ පසුගිය ආණ්ඩුව බවට ප‍්‍රචාරයක් ගෙන යන බවයි එම නිවේදනයේ දැක්වෙන්නේ. එහෙත් 2001 - 2004 එක්සත් ජාතික පක්ෂ ආණ්ඩුව සමයේදී උමා ඔය ව්‍යාපෘතිය ඉහල ප‍්‍රමුඛතාවකින් යුතු ව්‍යාපෘතියක් ලෙස ක‍්‍රියාත්මක කිරීමට තීරණය කර තිබූ බවයි මහින්ද රාජපක්ෂ මහතා පෙන්වා දෙන්නේ.
අදාල ව්‍යාපෘතිය ක‍්‍රියාත්මක කිරීමට කැබිනට් අනුමැතිය හිමිවුණේ 2005 වසරේ ජනවාරි 26 වනදා බවත්, ඒ එකළ චන්ද්‍රිකා කුමාරතුංග ආණ්ඩුවේ කෘෂිකර්ම අමාත්‍යවරයා වූ අනුර කුමාර දිසානායක විසින් ඉදිරිපත් කළ කැබිනට් පත‍්‍රිකාවක් අනුසාරයෙන් බවත් මහින්ද රාජපක්ෂ මහතා පෙන්වා දෙනවා.
උමා ඔය ව්‍යාපෘතියේ අඩුපාඩු සිදුව ඇත්තේ ව්‍යාපෘති උපදේශකවරුන්ගෙන් නිවැරදි උපදෙස් නොලැබීම හේතුවෙන් යැයි තමන්ට දැනගන්නට ලැබී ඇති බවද එම නිවේදනයේ සඳහන්.
ව්‍යාපෘතියේ උමං මාර්ගයේ මුලින්ම ජල කාන්දුවක් සිදුව ඇත්තේ 2014 දෙසැම්බර් 24වනදා වත්මන් ආණ්ඩුව බලයට පත් වීමට දින කිහිපයකට පෙර බවද එහි දැක්වෙනවා. කලට වේලාවට අවශ්‍ය පියවර ගනු ලැබුවේ නම් එමගින් සිදුවන පාරිසරික හානිය අවම කර ගැනීමට හැකියාව තිබූ බවද මහින්ද රාජපක්ෂ මහතා පෙන්වා දී තිබෙනවා.
