අයුතු ජනරාශියක සමාජිකයින් වෙමින් මරදාන ප්‍රදේශයේ පිහිටි විශ‍්‍රාම වැටුප් දෙපාර්තමේන්තුවේ නිලධාරීන්ගේ රාජකාරියට බාධා කළැයි කියන සිද්ධියක් සම්බන්ධයෙන් අත්අඩංගුවට ගෙන අධිකරණයට ඉදිරිපත් කළ පොලිස් ආබාධිත රණවිරුවන්ගේ සංගමයේ සභාපතිවරයා සහ ලේකම්වරයා පෙබරවාරි මස 06 වැනිදා දක්වා රක්ෂිත බන්ධනාගාර ගත කිරීමට කොළඹ ප‍්‍රධාන මහෙස්ත‍්‍රාත් අධිකරණය අද (31) නියෝග කළා.
මෙලෙස රක්ෂිත බන්ධනාගාර භාරයට පත් කරන ලද්දේ පොලිස් ආබාධිත රණවිරුවන්ගේ සංගමයේ සභාපති අසේල බණ්ඩාර සහ එම සංගමයේ ලේකම් ජගත් විජේසිංහ යන අයයි. පසුගිය වසරේ නොවැම්බර් මස 26 දා සිදු වූ සිද්ධියක් සම්බන්ධයෙන් මෙම සැකකරුවන් මරදාන පොලිසිය විසින් අත් අඩන්ගුවට ගෙන අධිකරනයට ඉදිරිපත් කළා.
