ගුවන් ගමන් බලපත‍්‍ර සම්බන්ධයෙන් ඇති වී තිබෙන අවුල් සහගත තත්ත්වය නිසා ශ්රී ලාංකික ගුවන් මගීන් වෙනත් රටවලදී අපහසුතාවයට පත්විය හැකි බව නෙත් නිවුස් කළ සොයා බැලීමකදී පෙනී ගියා.
සියලූ රටවල් සඳහා වලංගු වන පරිදි නිකුත් කෙරෙන ගුවන් ගමන් බලපත‍්‍ර මේ වනවිට අවසන් වී ඇති බවයි නෙත් නිවුස් මීට පෙර අනාවරණ කළේ.
ඒ අනුව සියලූ රටවල් සඳහා වලංගු වන ගුවන් ගමන් බලපත‍්‍ර අයදුම් කරන්නන්ට ආගමන හා විගමන දෙපාර්තමේන්තුව මේ වනවිට නිකුත් කරන්නේ සියලූ රටවල් සඳහා වලංගු බවට මුද්‍රාවක් සහිත මැදපෙරදිග රටවල් සඳහා පමණක් වලංගු ගමන් බලපත‍්‍රයි.
කෙසේ වෙතත් ඇතැම් රටවල් එවැනි සංශෝධිත ගුවන් ගමන් බලපත‍්‍ර පිළිනොගන්නා බව නෙත් නිවුස් වෙත අදහස් දැක්වූ කිහිපදෙනෙකුම කියා සිටියා. මේ නිසා සිය අපේක්ෂිත විදේශීය සංචාර කල්දැමීමට හෝ අතහැර දැමීමට පවා සිදුව ඇති බවයි ඇතැමුන් පැවසුවේ.
සංශෝධිත ගුවන් ගමන් බලපත‍්‍ර වලංගු නොවන බවට අන්තර් ජාතික සිවිල් ගුවන් සේවා රෙගුලාසියක් ද පවතින බවයි නෙත් නිවුස් කළ සොයා බැලීමේදී වැඩිදුරටත් දැන ගන්නට ලැබුණේ.
නෙත් නිවුස් මේ සම්බන්ධයෙන් ආගමන හා විගමන දෙපාර්තමේන්තුවෙන්ද විමසීමක් කළා. එහි ජ්‍යෙෂ්ඨ නිලධාරියෙකු පැවසුවේ ගුවන් ගමන් බලපත‍්‍රය කිසියම් රටකින් පිළිනොගැනීම නිසා පුද්ගලයෙකු අපහසුතාවට පත්වන්නේ නම් ආගමන හා විගමන දෙපාර්තමේන්තුව අදාළ රටේ සමගාමී ආයතනයට සිදු කරන දැනුම් දීමක් මගින් එම අපහසුතා මඟහරවාලිය හැකි බවයි.
