හම්බන්තොට සහ යාපනය ප්‍රදේශවලින් පසුගිය 07 වන දින යාත්‍රා කළ ධීවර යාත්‍රා දෙකක් පිළිබඳ දින ගණනාවක සිට කිසිදු තොරතුරක් හෝ පණිවිඩයක් ලැබී නොමැති බව ධීවර හා ජලජ සම්පත් දෙපාර්තමේන්තුව පවසනවා.
ධීවර කටයුතු සඳහා පිටත්ව ගිය එම යාත්‍රා දෙකෙහිම පුද්ගලයින් 06 දෙනෙකු සිට ඇති බවයි වාර්තා වන්නේ.
හම්බන්තොට නැංගුරම් පොළකින් සහ පේදුරුතුඩුව තොටුපොළින් එම යාත්‍රා දෙක පිටත්ව ගොස් ඇති බවයි ධීවර හා ජලජ සම්පත් දෙපාර්තමේන්තුවේ අධ්‍යක්ෂ ජනරාල් සුසන්ත කහවත්ත පැවසුවේ.
ශ්‍රී ලංකා නාවික හමුදාව සඳහන් කළේ මේ වන විටත් එම යාත්‍රා දෙක සම්බන්ධයෙන් සෝදිසි මෙහෙයුම් ආරම්භ කර ඇති බවයි.
