දුම්රිය ස්ථානාධිපතිවරුන් ඊයේ මධ්‍යම රාත්‍රිියේ සිට වැඩ වර්ජනයක නිරත වනවා.
නියමිත පරිදි උසස් වීම් ලබානොදීම ඇතුළු කරුණු 14 ක් මුල් කරගනිමින් දුම්රිය ස්ථානාධිපති සංගමය මෙම වැඩවර්ජනය ආරම්භ කළේ ඊයේ පස්වරුවේයි.
මේ හේතුවෙන් ඊයේ පස්වරුවේද සිය ගමනාගමන අවශ්‍යතා සපුරා ගැනීම සඳහා පැමිණි මගීන් දැඩි අපහසුතාවකට පත්වූණා.
දුම්රිය ස්ථානාධිපතිවරුන්ගේ වෘත්තීය සමිති පැවසුවේ තම ඉල්ලීම් සම්බන්ධයෙන් බලධාරීන් ප්‍රතිචාර නොදැක්වීම හේතුවෙන් වර්ජනය අතහැර නොමැති බවයි.
ඒ අනුව, ඊයේ මධ්‍යම රාත්‍රී 12න් පසු ධාවනය වීමට නියමිතව තිබූ දුම්රිය සියල්ල අවලංගු කළ බව දුම්රිය ස්ථානාධිපති සංගමය පැවසුවා.
දුම්රිය දෙපාර්තමේන්තුව ද සඳහන් කළේ, දුම්රිය ස්ථානාධිපතිවරුන් සහ දුම්රිය පාලකවරුන් විසින් ක්‍රියාත්මක කිරීමට නියමිත වෘත්තීය ක්‍රියාමාර්ගය හේතුවෙන් ඊයේ රාත්‍රියේ ධාවනයට සූදානම් කර තිබූ තැපැල් දුම්රියන් අවලංගු කිරීමට පියවර ගත් බවයි.
මේ වන විටද දුම්රිය ධාවනය සිදු නොවන බව මීට නොබෝ වේලාවකට පෙර කළ විමසීමකදී දුම්රිය පාලක මැදිරිය පැවසුවා.
කෙසේවෙතත් අද දින ධාවනයවීමට නියමිත කාර්යාල දුම්රිය කිහිපයක් හෝ අවශ්‍ය නිලධාරින් යොදවා ධාවනයේ යෙදවීමට කටයුතු සැලසුම් කරමින් පවතින බවයි දුම්රිය දෙපාර්තමේන්තුවේ ප්‍රකාශකයෙකු පැවසුවේ.
එහෙත් මේ දක්වා දුම්රිය ධාවනය වී නොමැති බව නෙත් නිවුස් අද අලුයම කළ සොයා බැලීමකදී අනාවරණ වුණා.
කෙසේවෙතත් සිය දායකත්වය නොමැතිව ආරක්ෂිත ලෙස දුම්රිය ධාවනය කිරීමට නොහැකි බවයි දුම්රිය ස්ථානාධිපතිවරුන්ගේ සංගමයේ සභාපති සුමේධ සෝමරත්න පැවසුවේ.
