Sunday, December 5, 2021

General line - 0115112241

හේමාස් සමාගම ‘Say Yes to Life’ සමගින් දියවැඩියාව පරාජය කිරීමේ අභියෝගය භාර ගනියි  

237Views



 

2021 නොවැම්බර් 14, කොළඹ: තම ව්‍යාපාර  ආරම්භයේ පටන්  ශ්‍රී ලාංකිකයින්ට සෞඛ්‍යසම්පන්න දිවියකට මග පෙන්වන හේමාස් හෝල්ඩින්ස් පී.එල්.සී. සමාගම, දියවැඩියාවෙන් තොර නිරෝගී ජීවිතයක වැදගත්කම ජනතාවට පෙන්වා දීමේ අරමුණින් ‘Say Yes to Life’ නමින් විශේෂ ව්‍යාපෘතියක් ආරම්භ කර තිබේ. මෙම නව වැඩසටහන සමග අත්වැල් බැඳගනිමින් වඩාත් තෘප්තිමත් ජීවිතයකට ප්‍රවේශයක් ලබාගන්නා මෙන් හේමාස් ජනතාවට ආරාධනා කර සිටී.   

මේ වනවිට සෑම ශ්‍රී ලාංකිකයන් සිව් දෙනෙකුගෙන්ම එක් අයෙකු දියවැඩියාවෙන් පෙළෙන බව සංඛ්‍යාලේඛන පෙන්වා දෙන අතර, එම සංඛ්‍යාව තව තවත් ඉහළ යමින් පවතී. මෙම තත්ත්ව හමුවේ, නිසි පෝෂණය සහ නිවැරදි ජීවන රටාවන් ඔස්සේ දියවැඩියාව වළක්වා ගැනීමේ වැදගත්කම පෙන්වා දීම ‘Say Yes to Life’ වැඩසටහනෙහි අරමුණ වී තිබේ. දියවැඩියාව පමණක් නොව අනෙකුත් බෝ නොවන රෝගද අවම වන පරිදි සෞඛ්‍ය සම්පන්න ජීවන රටාවන් අනුගමනය කළහැකි බව ජනතාවට අවබෝධ කරදීම සඳහා මෙම වැඩසටහනේදී ප්‍රමුඛතම අවධානයක් යොමුවනු ඇත.  

ශ්‍රී ලාංකිකයන් සාම්ප්‍රදායිකව ආහාරයට ගනු ලබන බත් මූලික කරගත් ආහාර වේල්, රුධිරයේ ග්ලූකෝස් මට්ටම පාලනයට එතරම් සුදුසු නොවේ. අනෙක් අතට මෙරට තුළ දියවැඩියාව වැළඳීමේ අවදානමට මුහුණ දී සිටින සහ පූර්ව දියවැඩියා අවධියට පැමිණ සිටින පුද්ගලයන් හඳුනා ගැනීමට විධිමත් ක්‍රමවේදයක්ද නොමැත. මේ නිසා දියවැඩියාව සම්බන්ධයෙන් ජනතාව නිසි පරිදි දැනුවත් කිරීමත්, ඊට එරෙහිව සක්‍රීයව පියවර ගැනීමට ඔවුන් යොමුකරවීමත් අතිශයින් වැදගත් වේ.  

“සෑම පවුලකටම වඩාත් යහපත් හෙට දවසක් උරුම විය යුතු බව හේමාස් විශ්වාස කරනවා.  පුද්ගලයන්ට සහ පවුල් වලට වඩාත් නිරෝගී හා සෞඛ්‍ය සම්පන්න ජීවන රටාවක් අනුගමනය කිරීම සඳහා අවශ්‍ය මගපෙන්වීම ලබාදීමට අප සෑම විටම උත්සාහ කරන්නේ ඒ නිසයි. අප සෞඛ්‍ය ක්ෂේත්‍රයේ විශාල පළපුරුද්දක් ඇති සමාගමක් නිසා, දියවැඩියාව නිසා ඇතිවන ගැටලු අප හොඳින් දැක තිබෙනවා. මේ නිහඬ උවදුර පරාජය කිරීමට අප කැපවී සිටින්නේ ඒ නිසයි.  ‘Say Yes to Life’ වැඩසටහන ඔස්සේ, දියවැඩියාව කල්තබා හඳුනාගෙන එය පාලනය කරන ආකාරය සම්බන්ධයෙන් ජනතාවට දැනුම ලබාදීමට අප බලාපොරොත්තු වෙනවා. සෞඛ්‍ය සම්පන්න ජීවන රටාවක් ඇති කර ගැනීම සඳහා අපගේ සමස්ථ කැපවීම සවිමත් කරමින්, සියලුම වයස් කාණ්ඩ වලට අයත් ශ්‍රී ලාංකිකයන් අතර බෝ නොවන රෝග පිළිබඳ විෂය පථය පරික්ෂා කිරීම සහ ස්ථරීකරණය කිරීම සඳහා අපි සෞඛ්‍ය අමාත්‍යංශය සමග සම්බන්ධ වී සිටිනවා.” හේමාස් හෝල්ඩින්ස් සමාගමේ සමූහ ප්‍රධාන විධායක නිලධාරිනී කස්තුරි චෙල්ලරාජා  මහත්මිය පැවසුවා ය.  

ශරීරයට අහිතකර ආහාර වර්ග නිතර පරිභෝජනය කිරීම සහ ක්‍රියාශීලීත්වයෙන් තොර ජීවන රටාවකට හුරුවීම වැනි සාධක නිසා, සියලු වයස් කාණ්ඩ වලට අයත් ජනතාව අතර ස්ථුලතාව බහුලව දක්නට ලැබේ. අලස ජීවන රටාවන් මගින් ඵලදායීත්වයද පහළ යන නිසා, එය ඔවුන්ගේ ආර්ථිකයටද අහිතකර ලෙස බලපායි. අනෙක් අතට, හදිසි රෝග තත්ත්වයක් ඇතිවුවහොත් පරීක්ෂණ සහ ප්‍රතිකාර සඳහා විශාල වියදමක් දැරීමට සිදුවන නිසා, දෙදෙනෙකු ආදායම් උපයන පවුලකට වුවද දැඩි දුෂ්කරතාවන්ට මුහුණ දීමට සිදුවීමට ඉඩ තිබේ.  

‘පවුල් වලට සෞඛ්‍යසම්පන්න දිවියක් ගතකිරීමට අත්වැලක් වීම’ යන සරල අරමුණ පෙරදැරිව, 1948 වසරේදී හේමාස් සමාගම ආරම්භ විය. මෙම සරල විශ්වාසය, පසුගිය වසර 70 ක කාලය පුරා එම සමාගමේ වර්ධනයට පාදක වී තිබේ. වර්තමානයේදී හේමාස් සමාගම තම පාරිභෝගික සන්නාම, සෞඛ්‍ය සේවා හා ප්‍රවාහන සේවා සමගින් එම මෙහෙවර යළි යළිත් ඉටුකරමින් සිටී. ශ්‍රී ලංකාවේ ආර්ථිකයේ කේන්ද්‍රීය සාමාජිකයෙකු වන හේමාස් සමාගම මේ වනවිට බංග්ලාදේශය, බටහිර බෙංගාලය සහ මියන්මාරය යන රටවලටද තම මෙහෙයුම් කටයුතු ව්‍යාප්ත කර තිබේ. ඉදිරියේදීත් විවිධත්වයෙන් සපිරි හා උද්යෝගීමත් මානව සම්පත් වෙනුවෙන් ආයෝජනය කරමින්, අර්ථවත් නිෂ්පාදන හා සේවාවන් හඳුන්වා දෙමින්, විශ්වාසනීය සම්බන්ධතා නිර්මාණය කරගනිමින්, වඩාත් අන්තර්කරණය වූ ලෝකයක පුරෝගාමීන් බවට පත්වෙමින්, තම සියලුම හවුල්කරුවන් වෙනුවෙන් සාධනීය වූ ප්‍රතිලාභ අත්කර දීම සමාගමේ පරමාර්ථය වී ඇත.