තවත් තරගයක් ඉතිරිව තිබියදී සංචාරක ශ්‍රී ලංකා කණ්ඩායම සමග පැවැත්වෙන පන්දුවාර විස්සයි විස්ස ක්‍රිකට් තරගාවලියේ ජය හිමිකර ගැනීමට නවසීලන්ත කණ්ඩායම අද සමත් වුණා.
ඒ, දෙරට අතර පැවති පන්දුවාර විස්සයි විස්ස දෙවන ක්‍රිකට් තරගය ලකුණු 45 කින් ජය ගැනීමත් සමඟයි. නවසීලන්ත කණ්ඩායම සමග පැවති පන්දුවාර විස්සයි විස්ස දෙවන ක්‍රිකට් තරගයේ කාසියේ වාසිය දිනා ගනු ලැබුවේ සංචාරක ශ්‍රී ලංකා කණ්ඩායමයි.
ශ්‍රී ලංකා කණ්ඩායමේ ඇරයුමෙන් ප්‍රථමයෙන් පන්දුවට පහර දුන් නවසීලන්ත කණ්ඩායම නියමිත පන්දුවාර විස්ස අවසානයේ කඩුලු 05 ක් දැවී ලකුණු 186ක් රැස් කළා.
මාර්ක් චැප්මන් පන්දු 29 කදී රැස්කල ලකුණු සංඛ්‍යාව 42 ක්. ටිම් රොබින්සන් හා මිචෙල් හේ ලකුණු 41 බැගින් රැස් කළා.
පන්දු යැවීමේදී වනිඳු හසරංග කඩුලු 02 ක් දවා ගත්තා. නුවන් තුෂාර සහ මතීෂ පතිරණ අතර එක් කඩුල්ල බැගින් බෙදී ගියා.
ජයග්‍රාහී ලකුණු 187 ක ඉලක්කයක් හඹා යෑමට පිටියට පිවිසි ශ්‍රී ලංකා කණ්ඩායමට පන්දුවාර 19 යි එක් පන්දුවක් අවසානයේ සියලු දෙනා දැවී රැස් කිරීමට හැකි වූයේ ලකුණු 141 ක් පමණයි.
කුසල් පෙරේරා ලකුණු 48 ක් සහ පැතුම් නිස්සංක ලකුණු 37 ක් රැස් කළා.
නායක චරිත් අසලංකට රැස් කිරීමට හැකි වූයේ ලකුණු 20 ක් පමණයි.
වෙනත් කිසිදු ක්‍රීඩකයෙකුට ලකුණු දහයේ සීමාව පසුකර යෑමට නවසීලන්ත පන්දු යවන්නන් ඉඩ ලබාදුන්නේ නැහැ. ජේකොබ් ඩෆී කඩුළු 4 ක් බිදහෙළුවා.
නවසීලන්ත - ශ්‍රී ලංකා පන්දුවාර විස්සයි විස්ස ක්‍රිකට් තරගාවලියේ තුන්වන සහ අවසන් තරගය ජනවාරි 2 වනදා පැවැත්වීමට නියමිතයි. එම තරගය ආරම්භ වීමට නියමිතව ඇත්තේ මෙරට වේලාවෙන් අලුයම 5 යි 45 ටයි.
