(Update)
උතුරු මැද පළාතේ හිටපු ප්‍රධාන අමාත්‍ය එස් එම් රංජිත් සහ ඔහුගේ පුද්ගලික ලේකම්වරිය ලෙස කටයුතු කළ ශාන්ති චන්ද්‍රසේන යන විත්තිකරුවන්ට කොළඹ මහාධිකරණය විසින් බරපතල වැඩ සහිත වසර 16 ක් බැගින් සිර දඬුවම් නියම කළා.
ඒ, අල්ලස් කොමිසම විසින් දූෂණ චෝදනා යටතේ ගොනු කර තිබූ චෝදනා දෙකකට වරදකරු කරමින්.
දීර්ඝ නඩු විභාගයකින් අනතුරුව කොළඹ මහාධිකරණ විනිසුරු ආදිත්‍ය පටබැඳිගේ මහතා විසින් මෙම තීන්දුව ලබා දුන්නා.
ඊට අමතරව එක් එක් විත්තිකරුට රුපියල් ලක්ෂ දෙක බැගින් දඩ නියම කළ මහාධිකරණ විනිසුරුවරයා එම දඩ මුදල ගෙවීම පැහැර හරිනු ලැබුවොත් අමතරව බරපතළ වැඩ සහිත වසර දෙකක් බැගින් සිර දඬුවම් නියම කරන බවත් සඳහන් කළා.
විත්තිකාර එස්.එම්.රංජිත් මහතාට එම චෝදනාව එල්ල වන්නේ 2012 වසරේ සැප්තැම්බර් මස 27 වන දා සහ 2014 වසරේ දෙසැම්බර් මස 31 දා අතර කාලසීමාව තුළ එම පළාත් සභාවේ ප්‍රධාන අමාත්‍යවරයා වශයෙන් කටයුතු කරමින් සිටියදීයි.
ප්‍රධාන අමාත්‍යවරයාගේ පෞද්ගලික ලේකම්වරියගේ වැටුප සමග ඉන්ධන දීමනාවක් එක් කර තිබියදී එය අභිබවා නීති විරෝධී ලෙස ඉන්ධන දීමනා වශයෙන් රුපියල් ලක්ෂ 26 කට අධික ඉන්ධන ප්‍රමාණයක් ලබාගැනීම සහ ඊට ආධාර අනුබල දීමත් සම්බන්ධයෙන් එස්.එම්. රංජිත් සහ ශාන්ති චන්ද්‍රසේන යන අයට චෝදනා එල්ල වී තිබුණා.
ඔවුන්ට එරෙහිව “දූෂණය” නැමැති වරද සිදු කළේ යැයි චෝදනා කරමිනුයි අල්ලස් කොමිසම විසින් මෙම නඩුව ගොනු කර තිබුණේ.
මෙසේ අවභාවිතා කළ ඉන්ධන ප්‍රමාණය ලීටර් 16,784ක් බවත් නඩුවේ විභාගයේදී අනාවරණය වුණා.
තීන්දුව ප්‍රකාශයට පත් කරමින් කොළඹ මහාධිකරණ විනිසුරු ආදිත්‍ය පටබැඳිගේ මහතා කියා සිටියේ විත්තිකරුවන්ට එරෙහිව අල්ලස් පනත යටතේ චෝදනා හයක් ගොනුකර තිබූ බවයි.
ඉන් චෝදනා දෙකකට විත්තිකරුවන් වරදකරු කරන බවත් විනිසුරුවරයා සඳහන් කර සිටියා.
දඬුවම් නියම කිරීමට පෙර අධිකරණය හමුවේ කරුණු දැක්වූ අල්ලස් කොමිසම වෙනුවෙන් පෙනී සිටි නීතිඥවරිය මෙම නඩුවේ පළමු වන විත්තිකාර හිටපු ප්‍රධාන අමාත්‍යවරයා මහජන ඡන්දයෙන් උතුරු මැද පළාත් සභාවට තේරී පත් වූ පුද්ගලයකු බව සඳහන් කළා.
මොහු මහජන ඡන්දයෙන් තේරී පත් වුණේ අනුරාධපුර දිස්ත්‍රික්කයෙන්.
අනුරාධපුර දිස්ත්‍රික්කය යනු තරමක දුෂ්කර දිස්ත්‍රික්කයක් බවත් එහි වැඩි වශයෙන් වාසය කරන්නේ ගොවීන් බවත් මෙහිදී ප්‍රකාශ කෙරුණා.
මෙසේ දුෂ්කර ජනතාවක් ජීවත් වන ප්‍රදේශයක මහජන නියෝජිතයින් වශයෙන් තේරී පත් වී මහජන මුදල් අවභාවිතා කරමින් විත්තිකරුවන් මෙම දූෂණ ක්‍රියාවේ නිරත ව තිබෙන බවයි අල්ලස් කොමිසම වෙනුවෙන් පෙනී සිටි නීතිඥවරිය පැවසුවේ.
2012 වසරේ ඔහු විසින් අවභාවිතා කළ මුදල් වල වටිනාකම රුපියල් ලක්ෂ 26 කට අධිකයි. එම මුදල්වල වර්තමාන වටිනාකම ඊටත් වඩා වැඩියි” යනුවෙන් සඳහන් කළ එම නීතිඥවරිය මෙම චෝදනාවල බරපතල භාවය සැලකිල්ලට ගෙන විත්තිකරුවන්ට නිසි දඬුවම් ලබා දෙන ලෙසත් ඇය අධිකරණයෙන් ඉල්ලා සිටියා.
විත්තිය වෙනුවෙන් පෙනී සිටි නීතිඥවරයා අධිකරණය හමුවේ කරුණු දක්වමින්, මෙය 2012 වසරේ සිදුවූ වරදක් බවත් විත්තිකරුවන් නඩුව කඩිනමින් අවසන් කිරීමට පූර්ණ සහාය ලබාදී ඇති බවත් සඳහන් කළා.
මෙම තත්ත්වය සැලකිල්ලට ගෙන තම සේවාදායකයින්ට ලිහිල් දඬුවමක් ලබා දෙන ලෙසත් ඔහු අධිකරණයෙන් ඉල්ලා සිටියා.
ඉන් අනතුරුව තීන්දුව ප්‍රකාශයට පත් කළ මහාධිකරණ විනිසුරුවරයා පැවසුවේ වෙනත් අපරාධ සම්බන්ධයෙන් දඬුවම් නියම කිරීමේදී අනුගමනය කරන ක්‍රියා පටිපාටිය මෙම සිද්ධියේදී අනුගමනය කිරීමට හැකියාවක් නොමැති බවයි.
මෙම නඩුකරය තුළින් අනාවරණය වන්නේ ආර්ථික අපරාධයක් බවත් පළමු වන විත්තිකරු මහජන නියෝජිතයකු වශයෙන් තේරී පත්වූ අයෙකු වන බවත් මහාධිකරණ විනිසුරුවරයා පැවසුවා.
ඔහු මහජනතාවට වගකිව යුතු ආකාරයෙන් කටයුතු කිරීමට බැඳී සිටිනවා. දූෂණ ක්‍රියා හේතුවෙන් රටේ ආර්ථිකයටත් අහිතකර බලපෑම් එල්ල වෙනවා. පසුගිය කාලයේ රට දැඩි ආර්ථික අර්බුදයකට මුහුණ දුන්නා.
මේ හේතුවෙන් රටේ ජනතාව දැඩි ලෙස පීඩාවට පත්වුණා. මෙවැනි ආර්ථික අර්බුදවලට රට තුළ සිදුවන දූෂණ ක්‍රියාද බලපාන බවයි මහාධිකරණ විනිසුරුවරයා පැවසුවේ.
එම නිසා මෙවැනි චෝදනා එල්ල වන මහජන නියෝජිතයින්, රජයේ නිලධාරීන් හා අධිකරණ නිලධාරීන් සම්බන්ධයෙන් ලිහිල්ව කටයුතු කිරීමට හැකියාවක් නොමැති බවයි කොළඹ මහාධිකරණ විනිසුරු ආදිත්‍ය පටබැඳිගේ මහතා කියා සිටියේ.
ඔවුන්ට නීතියෙන් ලබා දිය හැකි උපරිම දඬුවම් ලබාදීමට සිදුවෙනවා” යනුවෙන් සඳහන් කළ විනිසුරුවරයා අනතුරුව මෙම තීන්දුව ප්‍රකාශයට පත් කළා.
මෙම තීන්දුවට එරෙහිව අභියාචනා ඉදිරිපත් කිරීමට විත්තිකරුවන්ට හැකියාව පවතින බවයි විනිසුරුවරයා විවෘත අධිකරණයේ ප්‍රකාශ කළේ.
ඊට අමතරව විත්තිකරුවන්ගේ ඇඟිලි සලකුණු ලබා ගන්නා ලෙසත් විනිසුරුවරයා වැඩිදුරටත් නියම කළා.
