කොල්ලුපිටිය ප‍්‍රදේශයේදී පොලිසියට පහරදුන් බව කියන අන්තර් විශ්වවිද්‍යාල ශිෂ්‍ය බලමණ්ඩලයේ සිසුන් අත්අඩංගුවට ගැනීම සඳහා විමර්ශන සිදුකරන බව පොලිසිය පවසනවා.
පොලිස් මාධ්‍ය ප‍්‍රකාශක කාර්යාලය පැවසුවේ එලෙස පොලිසියට පහරදුන් සිසුන් මේ වන විට හඳුනාගෙන ඇති බවයි. කෙසේ වෙතත් ඔවුන් සැඟව ඇති බවට තොරතුරු වාර්තා වන බවයි පොලිස් ආරංචි මාර්ග පැවසුවේ.
මාලඹේ පෞද්ගලික වෛද්‍ය විද්‍යාලයට එරෙහිව අන්තර් විශ්වවිද්‍යාල ශිෂ්‍ය බලමණ්ඩලය සංවිධාන කළ විරෝධතා පා ගමනක් ඊයේ (31) පැවැත්වුණා. එම විරෝධතා පා ගමන වළක්වාලමින් අධිකරණය වාරණ නියෝගයක් ලබාදුන්න ද එය භාරගැනීම විශ්වවිද්‍යාල සිසුන් ප‍්‍රතික්ෂේප කරනු ලැබුවා.
එලෙස පැමිණි විරෝධතා පා ගමන වළක්වාලීමට පොලිසිය කොල්ලුපිටිය මංසන්ධියේදී මාර්ග බාධක යොදවා තිබුණා. ඒවා පෙරළා දමමින් ගමන් කිරීමට විශ්වවිද්‍යාල සිසුන් උත්සහ කිරීමත් සමගම පොලිසිය කඳුළු ගෑස් සහ ජල ප‍්‍රහාරයක් ද එල්ල කළා.
එම අවස්ථාවේදී සිසුන් ද පොලිසියට පහර දී තිබෙනවා. ගැටුමේදී තුවාල ලැබූ අන්තර් විශ්වවිද්‍යාලයීය ශිෂ්‍ය බලමණ්ඩලයේ සිසුන් 4 දෙනෙකු සහ පොලිස් නිලධාරීන් තුන් දෙනෙකු තවමත් කොළඹ ජාතික රෝහලේ ප‍්‍රතිකාර ලබනවා. ප‍්‍රතිකාර ලබන එක් සිසුවෙකුට ඊයේ රාත‍්‍රියේ සැත්කමක් ද සිදුකෙරුණු බවයි ජාතික රෝහලේ ප‍්‍රකාශිකාවක් පැවසුවේ.
