ශී‍්‍ර ලංකාවට ගිනිකොණ දෙසින් වායුගෝලයේ පවතින කැලඹිලි ස්වභාවය හේතුවෙන් අද (27) සිට දිවයිනේ ප‍්‍රදේශ රැසක වැසි තත්ත්වය වර්ධනය වනු ඇතැයි කාලගුණ විද්‍යා දෙපාර්තමේන්තුව පවසනවා.
ඒ අනුව උතුරු, උතුරු-මැද, ඌව සහ නැගෙනහිර පළාත්වලත් හම්බන්තොට දිස්ති‍්‍රක්කයේත් ඇතැම් ස්ථානවලට මිලි මීටර් 150 ක පමණ තද වැසි ඇති විය හැකියි.
මධ්‍යම සහ සබරගමුව පළාත්වලටත් ගාල්ල සහ මාතර දිස්ති‍්‍රක්කවල ඇතැම් ස්ථානවලටත් මිලි මීටර් 100 ක පමණ තරමක තද වැසි ද ඇති විය හැකි බවයි කාලගුණ විද්‍යා දෙපාර්තමේන්තුව වැඩිදුරටත් සඳහන් කළේ.
මේ අතර, මුහුද රළු වීම හේතුවෙන් ගාල්ල - කොළඹ ප‍්‍රධාන මාර්ගයේ තෙල්වත්ත සහ කහව යන ස්ථානවලින් මුහුදු ජලය සහ මුහුදු වැලි මාර්ගයට ගසාගෙන එමින් පවතින බව නෙත් නිවුස් වාර්තාකරු පැවසුවා. ඒ හේතුවෙන් මාර්ගයේ ගමන් කරන පුද්ගලයින් සහ වාහන හිමියන් දැඩි දුෂ්කරතාවයට පත්ව ඇති බවයි වාර්තා වන්නේ.
